Die Blueme werdet lokal am Zürisee abaut. Sie hend so nur churzi Transportweg und werdet frisch gschnitte. Mir chönd uf Schwankige bi de Bstellige schnell reagiere und schnidet nume das, was bstellt wird.
Entsprechend wird ganz wenig weggrüert. Und das direkt uf de Kompost. Denn die Blueme vo da, chamer beruhigt uf de Kompost due. Wills ebe natürlich sind.
100% natürlich. Das bedütet, mir schaffet ohni Gift/Pestizid oder sustigi chemischi Mittel. Mir nemet in Chauf, dass bispilswis dSchnegge en Teil vo üsne Blueme esset oder dBlueme mal nöd ganz perfekt sind, Blattlüs sich au im Garte wohl fühlet. So hets Platz für sganze Ökosystem. Was wiederum üs allne zguet chunt und gsünder isch.
Mir pflanzet saisonal ah. So bechunsch du zu jedere Jahreszit Blueme vom Zürisee und de Garte isch zu jedere Zit spannend, sowohl für üs Mensche wie au für Tier und insbesondere Insekte.
DBlueme und dStrüss werdet vo Hand pflanzt, pflegt und bunde. Es wird immer das brucht, wo gad dusse wachst.
Somit sind mir ressourceschonend unterwegs, ohni Tribhus und Strom. Defür mit Regewasser. Mi hend i üsem Garte mehreri Regewassertänk, wo mir im Summer bruchet zum dBlueme güsse. Am Schluss wird din Struss in Recyclingpapier und mitere kompostierbare Juteschnuer verpackt. That's it. Mir transportieret die Bluemestrüss mit Velo, Zug und zFuess.
Du chasch sie bi üs online bstelle oder i de Läde, wo mit üs zemeschaffet, poste.
Danke für din Bitrag zumene bewusste Konsum vo Floristik.
